खोडगाव येथील कर्जदाराला दिलासा, खासदार बळवंत वानखडे यांच्या हस्तक्षेपाने घर परत मिळण्याचा मार्ग मोकळा
युवा मेलघाट न्यूज नेटवर्क _________________________ खोडगाव ता. अंजनगाव सुर्जी : खोडगाव येथील विवेक दुर्योधन रामेकर यांनी मोतीलाल ओसवाल होम फायनान्स कंपनीकडून घरासाठी कर्ज घेतले होते. दुष्काळजन्य परिस्थिती आणि आर्थिक अडचणीमुळे काही हप्ते थकल्याने संबंधित कंपनीने त्यांच्या घरावर ताबा मिळवून कुलूप लावले होते.
या घटनेची माहिती मिळताच अमरावती लोकसभा मतदारसंघाचे खासदार बळवंतभाऊ वानखडे यांनी आज खोडगाव येथे घटनास्थळी भेट दिली. त्यांनी यावेळी मोतीलाल ओसवाल होम फायनान्स कंपनीच्या वरिष्ठ अधिकाऱ्यांना फोनवरून संपर्क साधून तसेच कंपनीच्या वकिलांशी चर्चा करून सदर प्रकरणात तातडीने कारवाई करण्याच्या सूचना दिल्या.
खासदार वानखडे यांनी विवेक रामेकर यांना 24 तासांच्या आत घराचा ताबा पूर्ववत करून देण्याचे निर्देश कंपनीला दिले. अन्यथा आपण स्वतः कुलूप तोडून संबंधित कुटुंबाला त्यांचे घर परत मिळवून देऊ, असा इशारा त्यांनी यावेळी दिला.
यावेळी प्रदीपभाऊ देशमुख, सुरेशभाऊ नेमाडे, खारोडेभाऊ, देविदासभाऊ देशमुख, वाघभाऊ, रमेशभाऊ सावळे, कैलासभाऊ शिरसाट यांच्यासह खोडगाव येथील ग्रामस्थ मोठ्या संख्येने उपस्थित होते.
