नागपूर येथे महाराष्ट्र राज्य शिक्षक परिषद प्राथमिक विभागाची दोन दिवशीय प्रांत स्तरीय बैठक संपन्न, शिक्षकांच्या विविध प्रश्नांवर चर्चा
युवा मेलघाट न्यूज नेटवर्क
नागपूर, 26 जुलै 2026: अखिल भारतीय शैक्षिक महासंघ संलग्नित महाराष्ट्र राज्य शिक्षक परिषद प्राथमिक विभागाची प्रांत स्तरीय दोन दिवशीय बैठक दिनांक 25 आणि 26 जुलै रोजी नागपूर येथे संपन्न झाली.
या बैठकीमध्ये परिषदेच्या राज्यभरातील विस्तारावर सविस्तर चिंतन आणि चर्चा करण्यात आली. तसेच लवकरच राज्यस्तरीय अधिवेशन घेण्याबाबत महत्वाचा निर्णय घेण्यात आला.
बैठकीत शिक्षकांच्या विविध प्रलंबित प्रश्नांवर सविस्तर चर्चा झाली. त्यामध्ये TET ची अनिवार्यता रद्द करणे, पदोन्नती प्रक्रिया गतिमान करणे, शिक्षक भरती तातडीने करणे, कंत्राटी शिक्षकांबाबत शासनाने स्पष्ट भूमिका मांडणे, जुनी पेन्शन योजना पूर्ववत लागू करणे, चटोपाध्याय आयोगाच्या शिफारशी लागू करणे, वरिष्ठ वेतनवाढ देणे, अप्रशिक्षित शिक्षकांना वेतनश्रेणी लागू करून त्यांचे एरिअर्स काढणे, तसेच जिल्हा व राज्य आदर्श शिक्षक पुरस्काराची वेतनवाढ पूर्ववत लागू करणे या सर्व महत्वाच्या मागण्यांचा पाठपुरावा करण्याचे ठरविण्यात आले.
या बैठकीला अमरावती जिल्ह्यातून मार्गदर्शक म्हणून अखिल भारतीय शैक्षिक महासंघाचे राज्य सचिव प्रा. प्रदीप खेडकर सर उपस्थित होते. तसेच जिल्हा पदाधिकारी श्री. रवी घवळे, जयश्री गरकल, ज्योती सानप आदी पदाधिकारी देखील उपस्थित होते.
