धारणीत मतदार यादीचे विशेष सखोल पुनरिक्षण सुरू: 19, 20, 26 आणि 27 सप्टेंबरला प्रत्येक बूथवर BLO राहणार हजर, 18 वर्ष पूर्ण युवकांसाठी सुवर्णसंधी
युवा मेलघाट न्यूज ब्युरो
धारणी | भारत निवडणूक आयोगाने जाहीर केलेला विशेष सखोल पुनरिक्षण कार्यक्रम अर्थात SIR 2026 हा संपूर्ण महाराष्ट्रासह मेळघाटातील धारणी तालुक्यातही अधिकृतपणे सुरू झाला आहे. याबाबत मतदार नोंदणी अधिकारी तथा सहा. जिल्हाधिकारी तथा उपविभागीय अधिकारी धारणी यांचे कार्यालया द्वारे माहिती जारी करण्यात आली आहे.
प्रशासनाने दिलेल्या माहितीनुसार दिनांक 31 ऑगस्ट 2026 ते 30 सप्टेंबर 2026 हा संपूर्ण महिना दावे आणि हरकती सादर करण्यासाठी निश्चित करण्यात आला आहे. मा. मुख्य निवडणूक अधिकारी, महाराष्ट्र राज्य यांच्या दिनांक 9 सप्टेंबर 2026 च्या पत्रानुसार धारणी तालुक्यातील प्रत्येक मतदान केंद्रावर चार विशेष दिवस शिबीरांचे आयोजन करण्यात आले आहे.
हे शिबीर दिनांक 19 सप्टेंबर, 20 सप्टेंबर, 26 सप्टेंबर व 27 सप्टेंबर 2026 रोजी सकाळी ठीक 10.00 वाजेपासून ते सायंकाळी 6.00 वाजेपर्यंत चालणार आहे. या चारही दिवशी तालुक्यातील प्रत्येक मतदान केंद्रावर त्या बूथचे केंद्रस्तरीय अधिकारी म्हणजेच BLO हे स्वतः उपस्थित राहणार आहेत, जेणेकरून नागरिकांना कोणतीही अडचण येणार नाही.
या शिबीरात नागरिकांकडून तीन प्रकारचे अर्ज स्वीकारले जाणार आहेत. एक – नवीन मतदार नोंदणी अर्ज, दोन – मतदार यादीतील नाव, पत्ता, फोटो किंवा इतर नोंदीच्या दुरुस्ती करिता अर्ज, आणि तीन – मयत किंवा दुबार असलेले नाव वगळणीकरीता अर्ज.
प्रशासनाने विशेष आवाहन केले आहे की ज्या युवक-युवतींचे वय दिनांक 01/10/2026 या अर्हता दिनांकावर 18 वर्ष पूर्ण होत आहे, परंतु अद्याप त्यांचे नाव मतदार यादीत लागलेले नाही, अशा सर्व युवकांनी या सुवर्णसंधीचा लाभ घ्यावा. मोठ्या संख्येने शिबीरात उपस्थित राहून नवीन मतदार नोंदणी अर्ज भरून आपले नाव मतदार यादीत समाविष्ट करून घ्यावे, असे आवाहन सिद्धार्थ शुक्ला मतदार नोंदणी अधिकारी तथा सहाय्यक जिल्हाधिकारी तथा उपविभागीय अधिकारी धारणी यांनी केले आहे.
धारणी सारख्या दुर्गम भागात प्रत्येक मतदारापर्यंत प्रशासन पोहोचवण्याचा हा प्रयत्न असून सर्व नागरिकांनी आपले मतदान केंद्र गाठून या लोकशाहीच्या उत्सवात सहभागी व्हावे.
