धारणी येथे आमदार केवलराम काळे यांच्या अध्यक्षतेखाली जनसमस्या निवारण आढावा बैठक संपन्न: जनतेच्या समस्या सोडविणे, शेतकऱ्यांना दिलासा देणे आणि शासकीय सेवा अधिक गतिमान करणे हाच या बैठकीचा मुख्य उद्देश
युवा मेलघाट न्यूज नेटवर्क –
धारणी, ता. 14 ऑक्टोबर :
मेळघाट विधानसभा मतदारसंघाचे आमदार केवलराम काळे यांच्या अध्यक्षतेखाली धारणी येथे जनसमस्या निवारण आढावा बैठक आयोजित करण्यात आली होती. या बैठकीत धारणी व चिखलदरा तालुक्यातील नागरिक व शेतकऱ्यांच्या विविध प्रलंबित समस्यांवर सविस्तर चर्चा करण्यात आली.
बैठकीदरम्यान महावितरण विभाग, सहकारी संस्था, राष्ट्रीयीकृत बँका, जिल्हा मध्यवर्ती सहकारी बँक तसेच इतर शासकीय विभागांशी संबंधित असलेल्या तक्रारी व प्रलंबित कामांचा आढावा घेण्यात आला. शेतकऱ्यांना येणाऱ्या अडचणी, विजेच्या समस्या, कर्ज प्रकरणे, तसेच शासकीय योजनांच्या अंमलबजावणीतील दिरंगाई या विषयांवर अधिकाऱ्यांकडून माहिती घेण्यात आली.
वनहक्क कायद्यांतर्गत वनपट्टे मिळविण्याच्या प्रक्रियेबाबतही या बैठकीत विशेष चर्चा झाली. वनपट्ट्यासाठी आवश्यक असलेली कागदपत्रे, शासनाचे नियम आणि पात्रता याबाबत नागरिकांमध्ये जनजागृती करण्याच्या सूचना आमदार काळे यांनी दिल्या. अनेक पात्र आदिवासी कुटुंबे कागदपत्रांअभावी वनपट्ट्यापासून वंचित राहत असल्याने त्यांना मार्गदर्शन करण्यावर भर देण्यात यावा, असे त्यांनी सांगितले.
यावेळी आमदार केवलराम काळे यांनी संबंधित विभागाच्या अधिकाऱ्यांना स्पष्ट निर्देश दिले की, नागरिकांच्या तक्रारींचे तातडीने निराकरण करावे, शासनाच्या विविध कल्याणकारी योजना पात्र लाभार्थ्यांपर्यंत पोहोचवाव्यात आणि प्रलंबित कामे प्राधान्याने पूर्ण करावीत. जनतेच्या समस्या सोडविणे, शेतकऱ्यांना दिलासा देणे आणि शासकीय सेवा अधिक गतिमान करणे हाच या बैठकीचा मुख्य उद्देश असल्याचे त्यांनी नमूद केले.
या आढावा बैठकीला उपविभागीय अधिकारी शुक्ला, धारणीचे तहसीलदार शेवाळे, नायब तहसीलदार माळी, तालुका कृषी अधिकारी जाधव, गटविकास अधिकारी रजस, सहकारी संस्थांचे अधिकारी अरबट, तसेच राष्ट्रीयीकृत बँका व सहकारी बँकांचे अधिकारी आणि आमदारांचे स्वीय सहाय्यक राहुल सोनोने यांच्यासह विविध विभागांचे अधिकारी उपस्थित होते.
