धारणीत भेसळयुक्त दूध विक्री करणार्यांचे धाबे दणाणले:
FDA ने २ डेअऱ्यांवर टाकला छापा, ४ नमुने जप्त
लवकरच दुध का दुध पाणी का पाणी होणार
पनीर आणि दुधाचा महापूर कसा? नागरिकांच्या तक्रारीनंतर प्रशासनाला जाग
युवा मेलघाट न्यूज नेटवर्क
धारणी शहरात भेसळयुक्त दुधाचा व्यापार राजरोसपणे सुरू असून नागरिकांच्या आरोग्याशी खेळ सुरू आहे. याच पार्श्वभूमीवर अन्न व औषध प्रशासनाने (FDA) धारणीतील दोन मोठ्या डेअरींवर छापा टाकून चार दुधाचे नमुने जप्त केले आहेत. मात्र कारवाईनंतरही शहरात भेसळयुक्त दूध विक्री कायम असल्याने नागरिकांमध्ये संताप व्यक्त होत आहे.
मिळालेल्या माहितीनुसार, धारणी शहरात गेल्या अनेक दिवसांपासून पनीरसाठी लागणारे दूध कुठून येते? असा प्रश्न उपस्थित होत आहे.मोठया प्रमाणात पनीर आणि दूध विकले जात असल्याने भेसळीचा संशय बळावला होता. मेळघाटात कार्यवाही कधी?याबाबत युवा मेलघाट न्यूजने वृत्त प्रकाशित केले होते. अखेर FDA विभागाला जाग आली.
FDA च्या पथकाने गुरुवारी धारणीतील दोन डेअरीमधून चार वेगवेगळ्या दुधाचे नमुने घेतले असून ते तपासणीसाठी प्रयोगशाळेत पाठवण्यात आले आहेत. या नमुन्यांचा अहवाल आल्यानंतरच दूध भेसळयुक्त आहे की नाही हे स्पष्ट होणार आहे.
पनीरसाठी दूध येते कुठून?
धारणीत पनीरची मागणी मोठी आहे, मात्र त्या तुलनेत दुधाचे उत्पादन कमी आहे. तरीही बाजारात मुबलक पनीर उपलब्ध होते. त्यामुळे हे पनीर भेसळयुक्त दुधापासून बनवले जात आहे का? असा गंभीर प्रश्न नागरिक विचारत आहेत. पनीर बनवण्यासाठी वापरण्यात येणारे दूध हे रसायनयुक्त तर नाही ना? अशी शंका व्यक्त होत आहे.
सध्या FDA ने नमुने घेतले असले तरी प्रत्यक्षात कारवाई काय होते याकडे संपूर्ण धारणीकरांचे लक्ष लागले आहे. भेसळयुक्त दूध विक्री करणाऱ्यांवर कठोर कारवाई करावी, अशी मागणी नागरिकांकडून होत आहे.
मालविया मूर्ति भंडार, रंगभवन मैदान, जयस्तंभ चौक धारणी. संजय मालवीय मो. 9420190084
