ठिबक, तुषार संच खरेदीसाठी आता आधीच मिळणार अनुदान, शेतकऱ्यांना दिलासा
युवा मेलघाट न्यूज़ नेटवर्क
मुंबई, – ठिबक आणि तुषार सिंचन संच खरेदीसाठी आधी लाखो रुपये उभे करावे लागण्याची शेतकऱ्यांची मोठी अडचण आता दूर होणार आहे. शासनाने अनुदानाची पद्धत बदलली असून आता खरेदीनंतर नव्हे तर खरेदीपूर्वीच अनुदान शेतकऱ्याच्या खात्यात जमा होणार आहे.
नानाजी देशमुख कृषी संजीवनी प्रकल्प म्हणजेच पोकरा टप्पा दोन अंतर्गत हा नवा निर्णय घेण्यात आला आहे. या योजनेंतर्गत निवडक गावांतील पात्र शेतकऱ्यांना थेट फायदा होणार आहे. भारतीय रिझर्व्ह बँकेच्या डिजिटल रुपी म्हणजेच सेंट्रल बँक डिजिटल करन्सीच्या माध्यमातून हे अनुदान दिले जाणार आहे.
या नव्या पद्धतीत अनुदानाची रक्कम रोख स्वरूपात नाही तर डिजिटल टोकन किंवा क्यूआर कोडच्या स्वरूपात शेतकऱ्याच्या मोबाईलमधील वॉलेटमध्ये जमा होईल. त्यामुळे अनुदान येईपर्यंत वाट पाहण्याची गरज राहणार नाही.
यापूर्वी शेतकऱ्याला आधी संपूर्ण रक्कम भरून संच खरेदी करावा लागत असे आणि नंतर अनुदान खात्यात येत असे. त्यामुळे अनेक छोट्या शेतकऱ्यांना सुरुवातीचे भांडवल उभे करणे शक्य होत नव्हते. आता केवळ स्वतःचा हिस्सा भरून संच घेता येणार आहे.
यासाठी कृषी विभागाची पूर्वसंमती मिळाल्यानंतर मोबाईलवर टोकन येईल. विक्रेत्याकडे गेल्यानंतर क्यूआर कोड स्कॅन केल्यावर अनुदानाचा हिस्सा थेट व्यवहारात जमा होईल आणि उर्वरित रक्कम शेतकऱ्याने भरायची आहे.
या सुविधेचा लाभ पोकरा प्रकल्पातील २१ जिल्ह्यांतील निवडक गावांमधील शेतकऱ्यांना मिळणार आहे. यामध्ये अनुसूचित जाती, जमातीतील सर्व पात्र शेतकरी आणि सर्व प्रवर्गातील महिला शेतकरी पात्र असणार आहेत.
अर्ज करण्यासाठी महापोकरा संकेतस्थळावरील डीबीटी प्रणालीवर जाऊन ठिबक किंवा तुषार सिंचन घटक निवडावा लागेल. त्यामध्ये सीबीडीसीद्वारे अनुदान वितरण हा पर्याय निवडावा. अर्ज करताना मोबाईल क्रमांक प्रोफाइलला जोडलेला असणे आवश्यक आहे. तसेच गुगल प्ले स्टोअरवरून पीएनबी डिजिटल रुपी ॲप डाऊनलोड करून नोंदणी करावी लागणार आहे.
युवा मेलघाट न्यूज़ चैनल ला follow करा…
https://whatsapp.com/channel/0029Vb7sAujK0IBi6xYEtI3C
—Advertisement—
मालविया मूर्ति भंडार, रंगभवन मैदान, जयस्तंभ चौक धारणी. संजय मालवीय मो. 9420190084
