मेळघाटच्या भोकरबर्डीतून उंच भरारी! शिक्षक प्रा. संजयकुमार राठोड यांना पीएच.डी. पदवी, गावकऱ्यांकडून दिमाखात सत्कार
युवा मेलघाट न्यूज | प्रतिनिधी
धारणी | कठीण परिस्थितीतही शिक्षणाचा ध्यास सोडला नाही आणि थेट पीएच.डी.पर्यंत मजल मारली! राष्ट्रसंत तुकडोजी महाराज उच्च माध्यमिक आदिवासी आश्रमशाळा, भोकरबर्डी येथील कर्तव्यदक्ष शिक्षक प्रा. संजयकुमार राठोड यांनी कविकुलगुरू कालिदास संस्कृत विद्यापीठ, रामटेक येथून “शिक्षक-शिक्षिकांचा आनंद निर्देशांक” या विषयावर संशोधन करून पीएच.डी. पदवी पटकावली आहे.
मेळघाटसारख्या दुर्गम भागात विद्यार्थ्यांना घडवत असतानाच स्वतःचे उच्च शिक्षण पूर्ण करणे ही सोपी गोष्ट नाही. पण प्रा. राठोड यांनी जिद्द आणि मेहनतीच्या बळावर हे करून दाखवले आणि संपूर्ण मेळघाटाचे नाव उंचावले. त्यांच्या या ऐतिहासिक यशाचा भोकरबर्डी येथे थाटात सत्कार करण्यात आला. भोकरबर्डीचे उपसरपंच रोहित श्रीपाल पाल यांच्या हस्ते त्यांना शाल, श्रीफळ व पुष्पगुच्छ देऊन गौरवण्यात आले.
“सेवा करताना शिक्षण – हीच खरी प्रेरणा”
यावेळी उपसरपंच रोहित पाल यांनी कौतुक करताना सांगितले, “दुर्गम भागात राहून समाजसेवा करत पीएच.डी. मिळवणे म्हणजे तरुण पिढीसाठी एक आदर्श आहे. प्रा. राठोड यांच्या संशोधनाचा फायदा शिक्षक आणि विद्यार्थी दोघांनाही होणार आहे.” प्रा. राठोड यांच्या संशोधनात “शिक्षक आनंदी असेल तरच विद्यार्थी घडेल” या महत्त्वाच्या मुद्द्यावर भर देण्यात आला आहे. त्यामुळे शिक्षण क्षेत्राला याचा मोठा फायदा होणार आहे.
या सत्कार समारंभाला वानखेडे सर, बोथे सर, पारडे सर, जारी सर, गहुकर सर, हरणे सर, गुंड सर, बारड सर, चौधरी सर, तांडील मॅडम, धूप्पे सर, नीचित सर यांच्यासह मुख्याध्यापक, सर्व शिक्षक, कर्मचारी, विद्यार्थी आणि ग्रामस्थ मोठ्या संख्येने उपस्थित होते. टाळ्यांच्या गजरात आणि अभिमानाने संपन्न झालेल्या या कार्यक्रमाने सिद्ध केले की, मेळघाटातही गुणवत्तेला कमी नाही. प्रा. संजयकुमार राठोड यांच्या पुढील संशोधन वाटचालीसाठी सर्वांनी मनःपूर्वक शुभेच्छा दिल्या.
