धारणी वनपरिक्षेत्र – टिंगऱ्या येथे गोठ्यात लपवलेला सागवान साठा उघड
युवा मेलघाट न्यूज़ नेटवर्क
धारणी : मेळघाटातील सागवान तस्करांवर आळा घालण्यासाठी वनविभागाने कंबर कसली आहे. खाया बीट मधील टिंगऱ्या गावात सोमवारी वनविभागाने गोपनीय माहितीवरून टाकलेल्या धाडीत मोठा अवैध साठा हाती लागला आहे.
प्राप्त माहितीनुसार, गावातील रहिवासी प्रकाश आरोटकर याने आपल्या घरामागील गोठ्यात 27 नग सागवान फळ्या चोरून लपवून ठेवल्या होत्या. सुमारे 0.377 घनमीटर असलेल्या या लाकडाची बाजारातील किंमत 35 हजार 473 रुपये आहे. वन पथकाने पंचनामा करून संपूर्ण माल जप्त केला.
अमरावतीचे मुख्य वनसंरक्षक ज्योती बॅनर्जी, परतवाड्याचे उपवनसंरक्षक गणेशन यांच्या सूचना आणि धारणीचे सहाय्यक वनसंरक्षक एस.एस. शिरसाट यांच्या मार्गदर्शनात ही मोहीम राबवण्यात आली. धारणी परिक्षेत्र अधिकारी एल.एम. शेख यांनी या पथकाचे नेतृत्व केले.
या पथकात वनपाल चंद्रे, मेटकर, वनरक्षक काळे, धांडे, इंगोले आणि वनमजूर शेख, वानखडे यांनी कामगिरी बजावली. जप्त मुद्देमाल धारणी वनपरिक्षेत्र कार्यालयात जमा करण्यात आला असून पुढील चौकशी वनपाल पी.एस. चंद्रे करीत आहेत.
