मेळघाटच्या १४,४९१ मतदारांचे फॉर्म अद्याप प्रलंबित; ८ ऑगस्ट शेवटची तारीख
उपविभागीय अधिकारी सिद्धार्थ शुक्ला यांचे आवाहन, वेळेत न भरल्यास नाव यादीतून वगळले जाण्याची शक्यता
धारणी प्रतिनिधी, युवा मेलघाट न्यूज
०४ ऑगस्ट २०२६
मतदार यादीच्या विशेष सघन पुनरीक्षण प्रक्रियेत ४१-मेळघाट विधानसभा मतदारसंघात अजूनही १४ हजार ४९१ मतदारांनी Enumeration Form भरले नसल्याचे समोर आले आहे. भारत निवडणूक आयोगाने दिलेल्या निर्देशानुसार ही प्रक्रिया पूर्ण करण्यासाठी ८ ऑगस्ट २०२६ ही अंतिम मुदत आहे. मुदतीत फॉर्म न भरल्यास पात्र मतदाराचे नाव यादीतून वगळले जाऊ शकते, असा इशारा मतदार नोंदणी अधिकारी तथा उपविभागीय अधिकारी सिद्धार्थ शुक्ला यांनी दिला आहे.
उपविभागीय अधिकारी कार्यालय, धारणी यांच्याकडून सोमवारी जारी करण्यात आलेल्या प्रसिद्धी पत्रकात ही माहिती देण्यात आली. पत्रकानुसार, मेळघाट मतदारसंघात धारणी शहरातील १२६५ आणि चिखलदरा शहरातील २६३ मतदारांसह एकूण १४,४९१ मतदारांचे फॉर्म प्रलंबित आहेत.
निवडणूक आयोगामार्फत संपूर्ण महाराष्ट्रात SIR म्हणजेच Special Intensive Revision राबविले जात आहे. या अंतर्गत मतदार यादीत नाव असलेल्या प्रत्येक मतदाराला Enumeration Form भरून आपल्या क्षेत्रातील BLO यांच्याकडे जमा करणे बंधनकारक आहे. ज्या मतदारांनी अद्याप फॉर्म भरलेला नाही, त्यांनी तात्काळ तो भरून द्यावा, असे आवाहन शुक्ला यांनी केले आहे.
“मतदार यादी अद्ययावत करणे ही लोकशाही बळकट करण्याची पहिली पायरी आहे. कोणताही पात्र मतदार या प्रक्रियेपासून वंचित राहू नये यासाठी सर्वांनी ०८/०८/२०२६ पूर्वी आपला फॉर्म BLO यांच्याकडे किंवा प्रशासनाने निश्चित केलेल्या केंद्रावर जमा करावा,” असे शुक्ला यांनी पत्रात म्हटले आहे.
प्रशासनाने स्पष्ट केले आहे की, Enumeration Form न भरल्यास विशेष पुनरीक्षणाच्या प्रक्रियेत अडचणी निर्माण होऊ शकतात. त्यामुळे मतदारांनी याकडे गांभीर्याने पाहून वेळेत सहकार्य करावे.
